Botanisk Rationalisma

Nú havi eg grenja nógv tað síðstu tíðina. Mínar seinastu bloggur hava verið rættuliga neiligar, men nú eri eg so gott í gongd, so eg haldi áframm eina løtu avtrat. Berið yvir við mær

Ein íðin, kristin og Føroyskur bloggari hevur júst skrivað ein blogg, sum eftir mínari meining er rættuliga óerligur og sleiskur, so eg kann ikki halda mær at viðmerkja bloggin eitt sindur.

Hann leggur út við at skriva:

Sekularistar banna Kristindómi men loyva islamskari bøn

(. . .)

Hetta vísir:

1) Sekularisma er anti-kristilig

2) Sekularisma er ov veik fyri teimum kreftunum sum nú flyta inn í vesturlendska samfelagið. Sjálvt um sekularisma er anti-kristin og enntá materialistisk, er hon kortini pro-islam
(. . .)
[Sekularistar] hava í hesum føri valt at bróta við annars harða normin um at skilja religión frá statinum.

Síðani leinkjar hann til hesa síðuna

Mín trupulleiki er, at eg ivist í, um hann hevur lisið tað sum hann leinkjar til.
Eg dugi slett ikki at síggja hví hann tosar um (sekularistar). Hetta hevur als einki við (sekularistar) at gera… satt at siga er eg ikki vísur í, um eg veit hvat hann meinar við (sekularistar). Um hann meinar fólk sum eru fyri skiljing av kirkju og stat, so ja. Tað er onkur kanska, og kanska ikki. Tað meldar søgan einki um.

Lat meg bakka eitt sindur og greiða frá hvat er hent í stórsta býnum í Kanada (Toronto).

Ein, fyri tað mesta muslimskur, skúli í Toronto, hevur í trý ár havt ein imam at leiða fríggjadagsbønir í kantinuni.
Skúlin rationaliserar við tí argumentinum at, hetta er besti mátin at sleppa undan, at næmingarnir ríma úr skúlanum fyri at biðja, uttan at koma aftur.

Hetta hevur sum sagt staðið á í trý ár. Aftaná døgurðan hava muslimsku næmingarnir verið verandi í kantinuni til fríggjadagsbøn, sum tekur einar 30 til 40 min.
Nústani nú hava kritikarir varnast hettar.
Tað fyrsta sum hendi var, at uml 4 juli leyp ein Hindu gruppa, sum er sera Islam-kritisk, á skúlan við tí argumentinum, at fríggjadagsbønin brýtur sekuler prinsippir í fólkaskúlaskipan teirra.

Hetta skrivaði “The Globe And Mail” (stórsta tíðindablaðið í Kanada) tann 4 og 5 Juli, og tað er tann fyrsta keldan sum eg havi funnið hesum viðvíkjandi. Her og her.

Tað er eftir mínari meining rættuliga ringt at siga, hvørt fríggjadagsbønin í kantinuni er lóglig. Kanada hevur søguliga havt kristna bøn í skúlanum, men í 1988 var hon burturtikin í landspartinum Ontario, (Har sum Toronto liggur).

Í Policy/Program Memorandum nr. 112 (1 Januar, 1991) hjá “The Ontario Ministry of Education” stendur m.a:

“The school may sponsor the study of religion, but may not sponsor the practice of religion.”

Men hinvegin er bønarløtan ikki beinleiðis stuðlað av skúlanevndini, so eg haldi ikki at hetta er ein trupulleiki.

Skúlanevndin í Toronto hevur faktiskt skrivað eitt svar uppá fjølmiðlatrýstið.
Har skriva tey m.a.

Where religious accommodation is concerned, the law is quite clear: freedom of religion in the Canadian Charter of Rights and Freedoms supersedes the Education Act. As a public school board, we have a responsibility and an obligation to accommodate faith needs.

Here are some facts regarding the law:

1. Indoctrinating religious instruction is prohibited in public boards.
2. Non-indoctrinating instruction about religion is allowed.
3. Scriptural readings from a variety of religions and beliefs, and moments of silence, are permitted during opening or closing exercises.

Eg veit ikki um muslimska fríggjadagsbønin er lóglig, tí at lógirnar eru rættuliga kringluttar, men har er ein tíðandi faktorur sum ger seg galdandi í hesum málinum. Nevniliga tað at hettar er ikki ein tvungin bøn. Skúlin tvingar ongan at møta upp, og hetta verður ikki trýst omaná tey, líkasum tann kristna skúlabønin hevur verið í langa tíð, og líkasum kristni morgunsangurin í Føroyum verður tann dag í dag (tá summarferian er liðug).

Skúlanevndin stendur óiva bert í einari tvístøðu. Á einari síðu hava tey stórstipartin av næmingunum í hesum skúlanum, sum eru muslimskir, og tískil skulu tey kanska biðja til Allah, til heilt bestemtar tíðir. Hettar er sjálvandi best at gera í skúlanum, vissi tað skal gerast mitt í døgurastóðginum, uttan at tey skulu missa skúlatímar aftaná bønina.
Á hinari síðuni hava tey lóggávu sum avmarkar hvat skúlin sleppur at stuðla, og soleiðis noyðast tey at finna eitt millumting.
Eg haldi tó ikki at hettar er eitt smart trekk hjá skúlanum. Skúlin húsar øgiliga diversar kulturar og religiónir, soleiðis at tað hevði verið ómøguligt at veitt hesa tænastu til allar. Tað hevði eftir mínari meining sostatt verið skilabest at halda seg púrasta religiónsneutralir (sekulerir).

Eg vil nú binda eina sloyfu um hetta og venda aftur til bloggin hjá kristna Føroyinginum.
Hann sigur at: “Sekularistar banna Kristindómi men loyva islamskari bøn”
Hvørjir sekularistar tosar hann um? Og hvat meinar hann við at “banna kristindóm”
Minnist til at, flestu næmingarnir í hesum skúlanum tilhoyra islam, og at hetta er ein sjálvboðin tænasta.

Hann sigur at: “Sekularisma er anti-kristilig (hetta er eingin loyna)”
Veit hann hvat sekularisma merkir? Sekularisma er religiónsneutral, tí eingin religión fær framíhjárætt – og nei – heldur ikki islam.

Hann sigur eisini at: “Sjálvt um sekularisma er anti-kristin og enntá materialistisk, er hon kortini pro-islam”
Anti-kristin og materialistisk??? Sekularisma og materialisma eru hugtøk innan heilt ymiskir heimar.
Hetta er líkasum at siga at rationalisma er botanisk, ella at algebra er kommunistiskt.

Eg eri í botn og grund rættuliga líkasælur viðv. handan vælsignaða skúlan í Toronto, men tað harmar meg, tá víðgongdir kristnir brongla sovornar søgur til at siga okkurt heilt annað enn tað sum veruliga hendir.
Tað allarmest ironiska er, at nógv víðgongd kristin gera alt fyri at fáa kreasjonismu og annað religiøst fjas inn í lívfrøði tímarnir.
Tey vilja undir ongum umstøðum avskaffa morgunsangin í fólkaskúlanum.
Í Føroyum hava vit ikki skilt sundur kirkju og stat, og tað dámar nógvum væl.
Men tá tað luktar av islam, so er fanin leysur.

Merki: , , , , ,

Hetta var lagt út 18 juli, 2011 klokkan 02:30 og er goymt undir bloggupostar. Tú kanst halda eygað við svarum umvegis RSS 2.0 feed. Tú kanst svara, ella trackbacka frá tíni egnu síðu.

2 svar to “Botanisk Rationalisma”

  1. Jón Joensen Says:

    Væl skrivað :)

  2. Heini Reinert Says:

    Eg eri sekularistur og eri óavmarkað fyri trúarfrælsi. T.v.s. at eg eri óavmarkað ímóti at stjórnin gevir nøkrum átrúnaði framíhjárættindi líka mikið hvønn átrúnað talan er um. Átrúnaður eigur ikki at hava nakað at siga fyri hvussu eitt land, ið eigur at vera fyri øll, skal stjórnast. Stjórnin eigur somuleiðis ikki at hava nakað at siga fyri hvussu einstaklingurin hevur hug at dyrka sín átrúnað.

    So lat okkum spæla at hald er í hesum kritikkinum av “sekularistum” í Kanada. Tað merkir so, at Kanadiskir sekularistar eru húklariskir og ikki liva upp til tað teir standa fyri. Hvat so? Hvussu ólukkan kann man próvføra frá “summir sekularistar eru húklarar” til “tískil er sekularisering pro-islam, anti-kristindóm, materialistisk etc.?” Tað kann man ikki. Tað at har eru anti-sekuler fólk til, ið kalla seg sekularistar, kann uppá ongan máta betíða at sekularisering er anti-sekuler. Herpaderp.

Svara

Connect with Facebook

Tað stendur øllum frítt at skriva júst tað, tey hava hug til í viðmerkingum til bloggupostar her. Bert spam verður strikað, men vænta tó ikki, at tað ber til at skriva hvat sum helst uttan mótstøðu frá øðrum viðmerkjarum :)