Postar merktir ‘LGBT Føroyar’

Gerðir teirra trúgvandi vitna sanniliga um ein lítlan Guð

Heimasíðan hjá Gudloysi varð um mánaðarskfiti apríl-maj 2013 strikað av Spacetown.org uttan ávaring. (Les nærri frágreiðing her.) Neyðugt var tískil at flyta til ein nýggjan netvert og at endurstovna síðuna frá einum gomlum trygdarriti. Tíverri mistu vit onkrar bloggupostar og tilhoyrandi viðmerkingar. Hesin blogguposturin varð endurstovnaður 17. juni 2013 frá Google cache. Tíverri er ikki gjørligt at endurstovna viðmerkingarnar. Vit her á Gudloysi eru framvegis ímóti at strika viðmerkingar, men tað sama kann ikki sigast um Spacetown. – Heini Reinert, skrivari

Tað má vera eitt syrgiligt lív at liva, um ein ikki hevur nakað betri at ganga uppí  enn at allar barnabøkur partú skulu vera líka fordømandi, sum ein sjálvur. Eiheldur hjálpir tað, at frásiga sær ábyrgdina av eins egnu fordómum við at skjóta teir í skógvarnar á einum ímyndaðum hægri myndugleika. Tað er í grundini bert eitt tekin uppá lágt sjálvsálit og vantandi persónligt dirvi til at standa til svars fyri egnar meiningar.

Tað er merkisverdugt, at okkum aldrin tørva at ákalla okkum samtykki Guðs fyri at grundgeva fyri veruligum sannroyndum; ongin hevur nakrantíð hildið fast við, at jørðin snarar um sólina, at alheimurin er uml. 14 mill. ára gamal, ella at svørt, samkynd og ótrúgvandi sjálvandi skulu hava somu rættindi sum hvít, hinskynd og trúgvandi bert tí Guð sigur, at so er. Ístaðin síggja vit tað øvugta; sólin snarar um jørðina, tí Guð sigur tað, alheimurin er 6000 ára gamal, tí Guð sigur tað, og svørt, samkynd og ótrúgvandi eru annanrangsborgarar, tí Guð sigur tað. Guð verður brúktur til at grundgeva fyri tí grundleysa, at rationalisera tað irrationella, og at rættvísgera tað órættvísa.

Hvat Guð sigst at halda, er søguliga ein betri trygging fyri, at okkurt er ósatt enn at tað passar. “Guð” hevur nær altíð tikið feil fyrr. “Guð” tekur eisini feil hesaferð. Um eg var Guð, og reint faktiskt var til, hevði eg verið illari inná trúgvandi enn gudloysingar. Onki er so Guðsspottandi sum at leggja Guði orð í munnin. Um ikki annað eru vit gudloysingar so mikið virðingarfullir yvirfyri Guði, at vit altíð geva honum høvi at tala fyri seg sjálvan.

Tíverri hevur hann aldrin tikið av okkara tilboði. Ella, um hann hevur, so er hansara rødd vorðin druknað í sjóðinum av øllum teimum mótstríðandi røddunum, ið allar siga seg tala hansara vegna um etisk mál. Í mun til hesar røddirnar, so eru etisku meiningar gudloysinga so mikið sterkar, at okkum ikki tørva yvirnáttúrligar undanførslur og umberingar fyri at hava tær.

Guð er eitt óneyðugt ískoyti, um ein hevur grein í sínum máli.

Foreldrafelagsins húklarí

Fyrr í dag útgav Foreldrafelagið eitt tíðindaskriv, har teir í strangum vendingum seta seg ímóti, at LGBT Føroyar skulu sleppa út á føroyskar skúlar, at tosa við næmingar um kynsligan samleika. Teirra grundgeving er sum fylgir:

Vit vilja sum foreldrafelag gera vart við, at tað hevði verið at gjørt seg inn á børnini, um vit loyvdu felagsskapum ella fyritøkum við egnum seráhugamálum, sum til dømis LGBT inn í skúlan við sínum boðskapi.

Tað kann samanberast við at Eik Banki kemur og sigur, at peningur er ein tíðandi partur av lívinum, og at Eik Bandi tí nú skuldi inn á skúlarnar, at undirvísa børnunum um peningaviðurskifti.

Vit vænta av almennu skúlunum at teir tryggja, at skúlagongdin hjá børnunum er í tráð við fólkaskúlalógina, og at teir ikki loyva bólkum við egnum seráhugamálum inn at undirvísa okkara børnum.

Nei, álvaratos! Slíkt húklarí skal ein leita leingi eftir. Tá eg sum piltur var næmingur á Argja Skúla, kundu tey tað sama havt bygt eina sveighurð til allar teir bólkarnar við seráhugamálum, ið vóru loyvdir inn at prætika fyri okkum. Onkur karismatisk samkoma fortaldi okkum um tungutalu og at útdríva illar andar. Blákrossur (um eg minnist rætt) setti upp vasar við plantum í alkoholiskum løgi, ið síðani følnaðu, fyri at vísa okkum, hvussu farligt tað er at drekka. Amnesty vóru úti og inni annan hvønn minutt. Ráðið fyri ferðslutrygd fortaldi okkum, at sanniliga fóru vit øll at lata lív, um vit gloymdu trygdarselan í bara fimm minuttir við 30 km/t. Og tað var bestemt ikki nakar av okkara smædnu lærarum, ið tók sær av okkara seksual undirvísing. Tað vóru tvær ungar og fittar gentir, ið – minnist meg rætt – ikki vóru lærarar, men sjúkrasystrar, ið fortaldu okkum um hvat standingar og eggjastokkar í grundini høvdu við hvørt annað at gera. Og hetta eru bert teir bólkarnir, sum eg av tilvild enn minnist frá Argja Skúla av. Hvar vóru mótmælini frá Foreldrafalagnum ímóti seráhugabólkum tá at hoyra?

Heilt erligt, Foreldrafelagið. Um tit eru snævurskygd og homofobisk, og tískil ikki vilja hava eklar bøssar í nærheitini av tykkara børnum, sig so bara tað. Men kom ikki her, og lat sum um, tit hava okkurt prinsipielt ímóti, at loyva seráhugabólkum inn í føroysku skúlastovurnar. Tí tað hava tit aldrin havt fyrr.

Dagføring 27. Apríl: Forkvinna foreldrafelagsins, Mai Laksafoss Simonsen, hevur nú biði um umbering felagsins vegna, og hevur drigið aftur mótmælið, sum hon sigur varð gjørt uttan undantøku frá allari nevndini.

Tað kunnu vit bert gleðast um, men eg sakni eitt sindur eitt úttalilsi um, hvat Foreldrafelagið so meinar um sakina. Men kanska kemur tað, um vit eru eitt sindur tolin.